Бэс ыйын 7 күнүгэр, Майаҕа Манчаары аатынан стадиоҥҥа нэһилиэктэр икки ардыларыгар ыытыллар комплекснай спартакиада чэрчитинэн төрүт оҕунан ытыыга «Байанай бэлэҕэ» күрэхтэһии буолан ааста. Барыта 15 хамаанда 57 кыттааччы күөн көрүстүлэр. Дьахталлар 30 м, эр дьон 40 м куобах, кус уонна тииҥ сыалларын ыттылар. Эр дьоҥҥо үс көрүҥ түмүгүнэн: бастакы миэстэҕэ Чыамайыкыттан сылдьар Дьулустан Стручков, иккис миэстэҕэ Чыамайыкыттан Евсей Куприянов уонна үһүс миэстэҕэ биһиги Харабыт нэһилиэгин бэтэрээн спортсмена Петр Захаров буоллулар. Дьахталларга бастакы миэстэни Чүүйэттэн Татьяна Петрова, иккис миэстэни Майаттан Евдокия Петрова уонна үһүс миэстэни Майаттан Маргарита Захарова ыллылар. Хамаанданан түмүк маннык буолла: 1 миэстэ Майа 2 миэстэ Хара 3 миэстэ Чүүйэ. Бу күрэхтэһии көрдөрбүтүнэн биһиги улууска төрүт оҕунан ытыы көрүҥэ инникилээҕин өссө күүскэ сайдар кыахтааҕын бэлиэтиибит. Күрэхтэһии бары кыттыылаахтарыгар чэгиэн туругу инникитин үрдүк ситиһиилэри баҕарабыт.
