Васильев Егор Пахомович 1911 сыллаахха ыам ыйын 6 күнүгэр Мэнэ-Ханалас Хара нэһилиэгэр төрөөбүт. Егор Пахомович 1924 сыллаахха Быдай начальнай оскуолатын бүтэрбит. 1926 сыллаахха Ленинскэй комсомол кэккэтигэр киирбит. 1927 сыллаахха Хараҕа бастакы комсомольскай тэрилтэ тэриллибит. Секретарынан, Васильев Егор Пахомовиһы талбыттар. Кинилэр сири түңэтиигэ, дьону үөрэхтээһиннэ, ыраас олођу киллэриигэ, кулааҕы кылаас быһыытынан эһиигэ, холкуостары тэрийсиигэ, дьонно культурнай олоҕу тэнитиигэ уо.д.а инники сылдьаллара.
Бу кэмнэ комсомол сорудаҕынан Егору сэбиэскэй кооперацияҕа салайар үлэҕэ анаабыттар, онтон Холбоско продавеһынан аҕыйах кэмңэ үлэлээбит, ол кэнниттэн холкуоһунай секцияҕа үлэлээбит.
1934с. 1 Тыыллыма нэһилиэгин сэбиэтигэр, бэрэссэдээтэллээбитэ.
1936с. колхоз председателлэрин курстарын бүтэрэн, райсовет дьаһалынан , II Хаптаҕай нэһилиэгин Тельман колхоз председателинэн анаммыт.
1940с. Сталин аатынан холкуос бэрэссэдээтэлэ.
1940-41сс. Моорук нэһилиэгин Калинин аатынан колхоз бэрэссэдээтэлэ.
1941-1942с.с. кулун тутарга диэри Сталин аатынан колхоз бэрэссэдээтэлэ.
Төрөөбүт сирим, дойдум чэчирии сайдыахтаах, атын сирдэртэн тоҕо биһиги итэҕэс буолуохпытый, дьон үлэлиирин үлэлээн, дьон онорорун онорон, өссө ордук үлэлиэх, оңоруох тустаахпыт — диэн санаанан төрөөбүт колхоһун салайыыга туруммут. Ханна баҕарар буоларын курдук, Хара нэһилиэгэр ыарахан күннэр турбуттара. Уот кураан алдьархайыгар, сут-кураан сатыылаабыт, туруу үлэһит, хоһуун эр-дьоннор уоттаах сэриигэ ынырыллан барыталаан эрэр кэмнэригэр, Егор Пахомович колхоз үлэтэ ыһыллыбакка-тоҕуллубакка, чөл туруктаах, дьон хоргуйан-сутаан өлбөтүн туһугар баар кыаҕын барытын туһанан үлэлээбит.
1942 сыл оройуон бары хаһаайыстыбаларыгар ыараханнык саҕаламмыт. нэһилиэктэр олохтоохторо сутаан, өлүү-сүтүү тахсыбыта. Сталин аатынан холкуос балаһыанньата атыттарга тэннээтэххэ ордук курдук этэ.
Васильев Егор Пахомович сэрии буоларын кытта, хаста даҕаны фроңңа барарга ирдэһэ сылдьыбыта да, эппиэттээх үлэҕэ сылдьар буолан ылбатахтара.
1942 с. олунньу 24 күнүгэр куоракка бэрэссэдээтэллэр курстарыгар үөрэнэ сырыттаҕына, дойдутугар ыыппака эрэ, фроңңа ыытар буолбуттарыгар кэргэнэ киирэн нэһиилэ көрсүһэн хаалбыта. Кини оннугар Григорьев Гаврил Николаевич-Харалыыр бэрэссэдээтэлинэн үлэлии хаалар.
Курскай дуга кыргыһыыта 1943 с. от ыйын 5 күнүгэр саҕаламмыта. Немецтэр авиация уонна танковай техника көмөтүнэн атаакалаан киирбиттэрэ. Сурун кыргыһыынан от ыйын 12 күнүгэр Прохоровка дэриэбинэ таһыгар буолбут танковай сэриилээһин ааттанар. Аатырбыт Тигр, Пантера танкалары Т-34 советскай танкалар кыайбыттара.
Бу ынырыктаах кыргыһыыларга Хара Ньургуна Васильев Егор Пахомович хорсуннук охсуспута. Кини барыта, 6 төгүл ыараханнык бааһырбыта, кэлин өттүгэр ата5ын унуо5ун то5о ыттаран 3-с группалаах сэрии инбэлиитэ буолан, 1945 с. кулун тутар ыйга демобилизацияланан кэлбитэ.
1946 сыл сааскыттан колхоһун салайбытынан, үлүскэннээх үлэ5э төбөтүн оройунан түһээр, сэрии кэннинээ5и айгыраабыт оло5у уһансыыга бары билиитин-дьо5урун түмэн 1951 сылга дылы үлэлиир. Ити кэмнэ кини колхоһугар локомотив таһаартаран, Хара5а аан-бастаан электрическай уот баар буолбута, олохтоохтор харанаттан сырдыкка тахсыбыт курдук сананан үөрбүттэрэ-көппүттэрэ.
Дьэ онтон ылата Сталин холкуоска сана производственнай тутуулар; Ороссолуода5а механизированнай кыһынны теплица, телефон, паровой станциялар электричествоны онороллор уонна бурдугу мээккэлиир миэлиңсэ үлэлэтэллэр Туустаахха икки этээстээх хотон туталлар. Холкуос тыраахтара, массыыната тыа хаһаайыстыбатыгар туттулар техниката элбиир. Уон сылынан Саха сиригэр тыа сирэ киһи билбэтин курдук сайдар. Онно Егор Пахомович тэрийбит Сталин холкуоһа республика бастын холкуоһунан билиниллибитэ.
1959-1960с.с. Ленин аатынан колхоз сылгы товарнай ферматын сэбиэдиссэйинэн.
1960-62с.с. Хапта5ай учаастак заведующайа,
1962 сыллаахха дойдутугар Хара нэһилиэгэр таба уонна саьылы иитэр ферманы тэрийбитэ. Сыл түмүгүнэн тыһыынчалыынан тысхаппыттара билигин кэпсээннэ эрэ сылдьар. Оло5ун тиһэх күннэригэр дылы бу тэрийбит ферматыгар дьону түмэн, бэйэтин сыратын-сылбатын биэрэн үлэлии сылдьыбыта. Васильев Егор Пахомович аата төрөөбүт нэһилиэгэр биир киэн уулуссатыгар иңэриллибитэ. Кыһыл Сулус орденнаах хорсун фронтовик, бастакы колхоһу тэрийсибит бэрэссэдээтэл, саха норуотун биир чулуу уола биир дойдулаахтарыгар оңорбут үтүөлэрин, Киһи быһыытынан аһыныгас майгытын, төрөөбүт-үөскээбит нэһилиэгин дьонноро саас-үйэ тухары өйдүү сылдьыахтара.
