Татьяна Афанасьевна 9 сааһыттан тулаайах хаалан кыайан үөрэммэтэх, онон оччотооҕу дьон сиэринэн кэлин „ликбез“ ол эбэтэр үөрэҕэ суохтары үөрэтиигэ анаммыт дьаһал көмөтүнэн үөрэхтэммитэ. Кини ол кэм сайдыытынан колхуоска киирэн үлэтин ыанньыксытынан саҕалаабыта, 1933 сыллаахха хас биирдии ынаҕыттан 800 литр үүтү, саха ынаҕыттан үрдүк көрдөрүүнү ситиһэр. Бу курдук көрдөрүүтүнэн өрөспүүбүлүкэҕэ ыытыллыбыт үлэ ыстахаанабыстарын бастакы съеһигэр кыттыыны ылар. Бу түмсүү туруорбут соругун Татьяна Афанасьевна бэйэтин оройуонун нэһилиэктэринэн элбэхтик сылдьан сырдаппыта, олоххо киириитигэр үлэлэспитэ.
1934 сыллаахха төрөөбүт нэһилиэгин олохтоохторо кинини нэһилиэк Сэбиэтин исполкомун бэрэсэдээтэлинэн талбыттара, онон салайааччы уустук үлэтигэр эриллиитэ саҕаламмыта. Үлэ сүрүн хайысхатынан буолара: коллективизацияны ыытыы, сүөһү иитиитин үлэтин өрө таһаарыы, ыраас олох, үөрэхтээһин- киһи барыта начаальнай оскуолаҕа үөрэнэн ааҕар,суоттуур буолуутун ситиһии, культура сайдыыта, о.д.а. элбэх үлэ. Киниэхэ Сталин аатынан холкуос бэрэсэдээтэлэ Гермогенов М.Н. салайааччы быһыытынан сайдарыгар улахан көмөнү оҥорбутун Татьяна Афанасьевна махтана кэпсиирэ.
Бу икки күүстээх салайааччылар дьону уопсай дьыалаҕа түмэн, үлэни тэрийээччилэри табан туруоран сүбэлэһэн үлэһээһин түмүгэр холкуос олоҕо лаппа тупсар. Өскөтүн 1932 сыллаахха 165 хаһаайыстыба баар буоллаҕына 1938 сыллаахха -531 хаһаайыстыба баар буолар, ити этэр биирдиилээн хаһаайыстыбалар бары колхуоска киирбиттэрэ. Маны сэргэ үлэ көрүҥнэринэн анаан дьарыктанар биригээдэлэри тэриллэллэр, ол курдук үүннэрэр, тутуу биригээдэтэ, оҕуруот аһын үүнэрэр, көлөнү туспа көрөр-харайар сибиинньэ иитиитэ о.д.а. культура, олох дьаһах тэрилтэлэрэ туспа тэриллэн кинилэр үлэлэригэр туспа үлэ күнэ ааҕыллар-учуоттанар. Маны сэргэ оҕолонор ийэлэр уоппускалара туспа көлөһүн күнэ көрүллэр. Үлэ сайдыытыгар саҥа тутуулар, техникалар баар буолаллар.
Ити үлэлэр түмүктэригэр Хара нэһилиэгин сэбиэтин үлэтэ үрдүк кэрдиискэ тахсан бастыҥ үлэтин туоһутунан 1936 сыллаахха РСФСР Киин Ситэриилээх Кэмитиэтигэр Саха Сирин Ситэриилээх кэмитиэтэ отчуоттуур буолбутугар, Хара нэһилиэгин сэбиэтин бэрэсэдээтэлин Чярева Т.А. делегатынан талыллар. Итиннэ кытта сылдьан Татьяна Афанасьевна аан маҥнай сахалыы тыл этэр ону сэргэ Саха Сирин делегациятын альбомун КСК бэрэсээдэтэлигэр М.И.Калиниҥҥа туттарбыта. Бу түгэни кини олоҕун саамай сырдык ааҕара. 13 сыл устата 1938-1947 сыллаахха диэри Саха АССР Верховнай Сэбиэтин депутатынан үлэлээбитэ. 1939 сылтан партия чилиэнэ 1940 сылтан партия райкомугар үлэҕэ ыытыллан. 1973 сылга бочуоттаах сынньалаҥҥа барыар диэри араас дуоһунастарга үлэлиир, уһун партия райкомун бюротун чилиэнинэн үлэлээбитэ.
1972 сылтан ыла улуус бочуоттаах гражданина, культура, үлэһиттэрин өрөсспүүбүлүкэтээҕи кэмитиэтин Бочуотун кинигэтигэр киллэриллибитэ. Бу үлэһит Чярева Т.А. ситиһиилэрин туохха үлэҕэ кыттыбытын туһунан „Якутия 1917- 1953 Хроника и факты, события“ диэн кинигэтигэр булан ааҕыахха сөп.
Татьяна Афанасьевна бочуоттаах сынньалаҥҥа тахсан баран „Албан аат оройуоннааҕы мусуойун“ Васильев Р.Р. тэрийсибитэ уонна 17 сыл үлэлээбитэ. Бу олоххо үлэттэн дьолун булбут саха боростуой дьахтара кэлэр көлүөнэҕэ холобур буола туруо.
