Никитин Павел Павлович 1932 сыллаахха тохсунньу ый 28 күнүгэр күн сирин көрбүтэ. Ийэтэ Никитина Прасковья Егоровна, ииппит аҕата Никитин Павел Павлович – дьоҥҥо сэргэҕэ биллэринэн Мааны Байбаас.Павел Павлович “Саха театра”, “Саха сценатын маастардара”, “П.М.Решетников” диэн билигин киһи тымтыктанан көрдүүр кинигэлэрин сүрүн автора. Кини Улахан Советскай Энциклопедия 30-с томугар П.А.Ойуунускай аатынан Саха драматическай театрын туһунан аналлаах салааны суруйбута.
Үгүстэр Павел Никитин Саха сирин туһунан документальнай киинэ сайдыытыгар үтүөлээх. Кини сүүрбэччэ сыл устата, илиитин араарбакка, республика киинэтин үлэһиттэригэр сыһыарыллан үлэлээбитэ: 10-тан тахса сыл урукку ГДР “ДЕФА” диэн киностудиятын айар бөлөҕөр консультант — сүбэһитэ. Саха сирин туһунан элбэх, бэртээхэй документальнай киинэни устубут немец доҕотторо кини үтүөтүн — өҥөтүн үрдүктүк сыаналыыллара. 1989 с. кэргэнин Клавдия Ефимовнаны кытта ГДР-га ыҥыран ыалдьыттата сылдьыбыта. Павел Павлович эһиги бары билэр “Суһаллык… Кистэлэҥ… Губчекаҕа…” диэн уус-уран киинэҕэ консультаннаабытын умнар эмиэ сатаммат.
