1895 сыллаахха Мэҥэ-Хаҥалас оройуонун I-й Хаптаҕай нэһилиэгэр дьадаҥы-бааһынай кэргэнтэн төрөөбүтэ.
Үлэҕэ дьулуур, кыһамнньы, сатабыл Дмитриева Дария Павловна сүрүн качествата. 1929 сыллаахха колхозка членинэн киирбитэ, онтон ыла колхозка, кэлин совхозка илиитин араарбакка үлэлээбитэ.
1930 сылтан сүөһү иитиитигэр-доярканан 1952 сылга дылы үлэлээбитэ, ол кэнниттэн 14 сыл устата ньирэй көрүүтүгэр үлэлээбитэ. Ол үлэлиирин усталарыгар куруутун хайҕалга, бочуокка сылдьыбыта. Бастыҥ ньыманы уонна уопуту олоххо киллэриигэ инициатор.
Сталин аатынан колхозка сүөһү иитиитин маастара, социалистическай тыа хаһаайыстыбатын туйгуна ааты ылбыта. Ол үлэлэрин партия уонна правительство үрдүктүк сыаналаабыта. 14 сыл устата биир да ньирэйин энчирэппэккэ 100 бырыһыан тыыннаахтыы иитэн төлөһүппүтэ, улаатыннартаабыта, сууккаҕа 780 -нуу грамҥа тиийэ эбиллэллэрэ. Оройуоннааҕы тыа хаһаайыстыбатын быыстапкатыгар көрдөрбүт алта ыйдаах тыһы ньирэйэ 210 киилэни үктээбитэ! Өрөспүүбүлүкэ чулуу сүөһү көрөөччүтэ Дария Павловна Дмитриева -Баһыыбалаах Даайа үс төгүл Норуот хаһаайыстыбатын ситиһиитин Бүтүн Сойуустааҕы быыстапкатыгар кыттыбыта. 1957 сыллаахха саха дьахталларыттан биир бастакынан Ленин уордьанынан наҕараадаламмыта.
