В.И.Ленин аатынан сопхуос тэриллибитэ 55 сылыгар анаммыт искибиэр аһыллыыта

Балаҕан ыйын 29 күнүгэр
Нөөрүктээйи нэһилиэгэр В.И.Ленин аатынан сопхуос тэриллибитэ 55 сылыгар анаммыт искибиэр аһыллыытыгар Хара нэһилиэгин М.Д.Петров отделениятын араас кэмнэргэ үлэни өрө туппут  үлэһит дьоммутун бэлиэ тэрээһиҥҥэ сырытыннардыбыт. 
М.Д.Петров аатынан отделение үлэтин хайысхалара : ынаҕы, сылгыны, саһылы иитии, бурдугу ыһыы буолар. В.И. Ленин аатынан сопхуос тэриллибитэ 55 сылын чэрчитинэн сопхуос устуоруйатын, ыыппыт үлэтин, олоҕун-дьаһаҕын үйэтитэр, кэнэҕэски ыччакка тиэрдэр сыаллаах искибиэр арыллыыта тэрилиннэ. Искибиэр киинигэр  Ленин пааматынньыга, сэттэ отделениелар истиэндэлэригэр үлэлээн ааспыт дьон ааттара, ситиһиилэр киирдилэр, мемориалга сопхуос дириэктэрдэрэ, киэн туттар дьонноро үйэтитилиннилэр.
Ытык-мааны туруу үлэһит бэтэрээннэрбит бииргэ алтыспыт үөлээннээхтэрин көрсөн, эдэр саастарын санаан, айар-тутар үлэлээн ааспыт кэмнэрин ахтан астыммыттарын, үөрбүттэрин-көппүттэрин биллэрдилэр. Убаастабыллаах Ленин сопхуос М.Д.Петров аатынан отделение бастыҥ үлэһиттэрэ, тыа сирин ыарахан үлэтигэр эдэр эрчимнээх сааскытын анаабыккытын бэлиэтээн туран, тулуургутугар, дьаныаргытыгар сүгүрүйэн туран, сыралаах, үтүө суобастаах үлэҕитигэр дириҥник махтанабыт!
Баҕарабыт туруу үлэһит дьоммутугар, чэгиэн туругу, уйгу-быйаҥ  олоҕу, тус бэйэҕитигэр уонна чугас дьоҥҥутугар ситиһиини, дьолу-соргуну!