Сэтинньи ый 25 күнүгэр “Уруйдан олоҥхо Манчаары дойдутугар!” Мэҥэ Хаҥалас улууһугар олоҥхо ыйын чэрчитинэн Хара нэһилиэгин үтүө түөлбэтин, дьондойор саалатыгар “ Айыллаан” култуура киинин сырдык уораҕайыгар “ДЬЭ! ОЛОҤХО!” диэн тэрээһин ыытылынна. Саха сиэринэн алаадьылаан, саламааттаан, сахалыы сыт таһааран, арчылаан ыалдьыттарбытын көрүстүбүт.
Сэргэх тэрээһиҥҥэ кыттыыны ыллылар И.Г.Игнатьев аатынан Хара спортивнай орто оскуолатын 6-7 кылаас үөрэнээччилэрэ, учууталлара, аҕам саастаах нэһилиэкпит олохтоохторо. «Олоҥхо эйгэтэ» диэн кинигэ быыстапката турда. Тэрээһини ыытта «Айыллаан» култуура киинин фольклориһа Саха Өрөспүүбүлүкэтин култууратын туйгуна Виталий Очиров- Алгыс Ачыырап. Олоҥхо билиҥҥи истээччигэ, чуолаан оскуола оҕолоругар, ыччакка ордук тиийимтиэтик айылҕаҕа чугаһатан үөрэтэн турукка киллэрдэ., өйдөнүмтүөтүк олоҥхо тула сэһэргэстилэр, саха айылҕа оҕото буоларын быһыытынан этин-хааны уһугуннарыытын, ийэ кылыһаҕын арыйарга маастар кылаас ыытта.
Ыччат дьон олоҥхо дириҥ эйгэтигэр киирэригэр тирэх буолан биир дойдулаахпыт, Хара нэһилиэгиттэн төрүттээх биллиилээх олоҥхоһуппут Николай Иванович Степанов -Ноорой «Күн Эрили» олоҥхотун киириттиттэн быһа тардан толоруутун истээччилэр болҕомтолорун тарта. Хамаанданан арахсан сахалыы остуол оонньуута ыытылынна. https://youtu.be/8RWLCzXliCc?si=M5r_a1iZUAl9ayb0
