«Өрүүтүн махтаныаҕын! Үйэлэргэ сүгүрүйүөҕүн» улуус маҥнайгы ыһыаҕа тэрилиннэ
Бачыымы, саҥаны тарҕаппыт,
Бастыҥнар ааттарын ааттаппыт,
Ат сүүрэр, ыһыахтыыр кындыллаах
Алаарар Куон Харах алаастаах.
Мин Харам – киэн туттан ааттыыбын (В.Сидоров)
Бэс ыйын 12 күнүгэр Арассыыйа күнүн, Улуу Кыайыы 80, Арассыыйаҕа Аҕа дойдуну көмүскээччи, Саха сиригэр Ийэ дойдуну көмүскээччи, улууска Тыа хаһаайыстыбатын сылларын чэрчитинэн Хара нэһилиэгэр «Өрүүтүн махтаныаҕын! Үйэлэргэ сүгүрүйүөҕүн» ыһыах тэрилиннэ.
Улуус маҥнайгы ыһыаҕар Хара нэһилиэгин олохтоохторо, ыраахтан-чугастан кэлбит ыалдьыттара Арҕаа Куон-Харах алааһыгар кэлбиттэрэ.
Алгыс түһүлгэтигэр ыһыах аһыллар уонна биэс харахтаах харысхал саха бэлиэтин тула дьоҥҥо-сэргэҕэ алгыс сиэрин-туомун Виталий Очиров толорбутун кэннэ нэһилиэк баһылыга Дария Назарова Ытык Дуоҕанытын туруорда.
«Айыллаан» култуура киинин режиссера Николай Васильев-Айтамыл туруоруутунан Хара олохтоохторо бэлэмнээбит «Үтүө дьоммут аатын үйэтитэр – ытык иэспит» инценировкаларын бар дьону кытта оһуокайынан түмүктээтилэр.
Эҕэрдэ тыллары кытта анал наҕараадалары Дария Ивановна, СӨ норуот хаһаайыстыбатын үтүөлээх үлэһитэ, «Эрэл» Уһук хоту дойду бэтэрээннэрин коммерческайа суох пуондатын бырабылыанньатын бэрэссэдээтэлэ, СӨ норуотун хаһаайыстыбатын үтүөлээх үлэһитэ, СӨ социальнай сулууспа туйгуна, СӨ, Мэҥэ Хаҥалас, Эбээн Бытантай улуустарын Ытык гражданина, Саха сирин ил уонна уопсастыба диэйэтилэ, Саха АССР Үрдүкү Сэбиэтин бэрэссэдээтэлэ Люлия Григорьева туттардылар.
СӨ култууратын туйгуна Виталий Очиров 20 сыллаах айар үлэтин эҕэрдэ кэнсиэрин «Истиҥ иэйии сырдык түһүлгэтэ» бэлэхтээтэ.
Салгыы тэрээһин хаамыытынан түһүлгэлэргэ оҕолорго аналлаах күрэхтэр, оонньуулар, «Маанылаах сахам таҥаһа», «Түөлбэ күөлэ холобурдаах түһүлгэтэ тэрийиэх», «Өбүгэ үгэһин утумнаан», «Бэрт Хара» күрэхтэрэ бастыҥнары быһаардылар.
