“Дьоруой баартата”, ол эбэтэр, хорсун быһыы хаһан да умнуллубат
🪖 И.Г.Игнатьев аатынан Харатааҕы орто уопсай үөрэхтээһин оскуолатыгар тохсунньу 27 күнүгэр биир умнуллубат, эмиэ да үөрүүлээх, эмиэ да кутурҕаннаах бэлиэ күн үүннэ.
🐻❄️ Дойдубут “Биир ньыгыл Арассыыйа” баартыйатын көҕүлээһининэн үөрэнээччилэргэ биир дойдулаахтарын – Дьоруойдар килбиэннээх, хорсун быһыыларын санатар, кинилэр сырдык ааттарын үйэтитэр, дойдуга бэриниилээх буоларга иитэр сыаллаах 2018 сылтан үлэлиир, көлүөнэлэри ситимниир “Дьоруой баартата” бырайыак арыллыыта буолла. Дьоруой баартатыгар хорсун уолаттарбыт Семен Николаевич Марков, Иван Иванович Захаров, Василий Павлович Жирков-Антонов, Сергей Сергеевич Шишигин хаартыскалара, кинилэр кылгас биографиялара киирбит.
❤️ Бэлиэ тэрээһиҥҥэ Арассыыйа Дьоруойдара Алексей Петров – Медведь уонна Андрей Григорьев – Тута, нэһилиэк баһылыга Дария Назарова, улуус дьокутааттарын сэбиэтин бэрэссэдээтэлэ Иннокентий Андросов, ону тэҥэ анал байыаннай дьайыыттан уоппускаҕа кэлбит уолаттар Игорь Егоров, Юрий Антонов, волонтер Елена Лебедкина оҕотунуун, 4-с кылаас үөрэнээччитэ Айаал Захаровтыын, өрөспүүбүлүкэтээҕи «Үрүҥ көмүс волонтердар» түмсүү салайааччыта Валентина Васильева уонна “Дьоруой паартатыгар” киирбит байыастар, анал байыаннай дьайыы кыттыылаахтарын дьиэ кэргэннэрэ кыттыыны ыллылар.
🙏 Уолаттар сырдык ааттарын үйэтитэр “Дьоруой баартатыгар” оскуола бастыҥ үөрэнээччилэрэ олоруохтара. Дьоруойдарбыт ааттара үйэлэргэ умнуллуо суоҕа!
