Саха Өрөспүүбүлүкэтигэр Култуура сылынан, Аан дойду үҥкүүтүн күнүгэр аналлаах „Үҥкүү алыптаах эйгэтэ“ диэн үҥкүү кэрэ киэһэтин арыйар истиҥ тэрээһин «Айыллаан» култуура киинигэр ыытылынна. Үҥкүү… бу киһи дууһатын тыына, этин-сиинин кэрэтэ. Үҥкүүһүт сирдээҕи аанньал, кини хамсаныыта – саас иэйиитэ, салгын сипсиэрэ.
Айыллаан култуура киинин балетмейстера, Айыллаан Аартыктарын Аламай Аартыга Мария Романова салайыылаах кэллэктииптэрэ: Дьулуур, Кэрэл, Күн Оҕолоро үҥкүү бөлөхтөрө кыттыыны ыллылар. Ону кытта үөрүүлээх тэрээһиммитигэр кырачаан үҥкүүһүттэрбит «Кэрэчээн» оҕо уһуйаанын бэлэмнэнии бөлөҕүн иитиллээччилэрэ кытыннылар.
Үҥкүүбүт киэһэтэ Элла Никитина истиҥ нарын үҥкүүтүнэн саҕаланна. Хара нэһилиэгэ тыа сирин түөлбэтин баһылыга Дария Ивановна Назарова, Айыллаан култуура киинин дириэктэрин эбээһинэһин толорооччу Татьяна Юрьевна Степанова, И.Г. Игнатьев аатынан Хара спортивнай орто оскуолатын оҕону иитэр-үөрэтэр үлэҕэ дириэктэри солбуйааччыта Туана Андреевна Махатырова эҕэрдэ тылларын эттилэр. Дария Ивановна Мария Романоваҕа Хара нэһилиэгэ тыа сирин түөлбэтин социальнай экономическай сайдыытыгар кылаатын иһин анал бэлиэни туттарда. Ону тэҥэ «Үҥкүү Алыптаах эйгэтэ» үҥкүү киэһэтигэр маҥнайгытын «Бастыҥ Үҥкүүһүт» диэн анал ааттар туттарылыннылар. Ол курдук оҕолорго Айыына Цыпандина, ыччаттарга Ирина Захарова, аҕам саастаахтарга Ольга Никифорова ыллылар. Бу бэлиэ сылын-ахсын бастыҥ үҥкүүһүттэргэ туттарыллар буолуоҕа.
Оскуола аатыттан Күн Оҕолоро үҥкүү бөлөҕүн бары кыттыылаахтарыгар уонна салайааччытыгар Мария Романоваҕа, Туана Андреевна эҕэрдэ суруктары уонна өйдөбүнньүк бэлэхтэри туттартаата. Ону кытта кэнсиэрбит аҕам саастаах кыттааччылара, Дьулуур үҥкүү бөлөҕө салайааччыларыгар анаан сибэкки дьөрбөтүн истиҥ тыллары этэн туран туттардылар. Ылбаҕай ырыаларынан Виталий Очиров, Николай Васильев – Айтамыл, Айыллаан Аартыктара бөлөх киэргэттилэр. Бүгүҥҥү киэһэҕэ, үҥкүү тыынынан олорор дьон, күндү көмүс көрөөччүлэр толору саала буолан, сылаас ытыстарын тыаһын утары уунан астынан дуоһуйан тарҕастылар.
Кыттыыны ылбыт бары дьоммутугар, үөрүүбүтүн үллэстибит күндү көрөөччүлэрбитигэр барҕа баһаам махтал тылларбытын биллэрэбит. Сырдык санааҕыт Саҕахтары сырдаттын. Ыраас ыра санааҕыт Ыллыктаах буоллун. Үтүө санааҕыт Үрдүккэ кынаттаннын!
Айыллаан Аартыктара.
