Былыр былыргыттан ынах сүөһү сайыҥҥы мэччирэҥҥэ тахсыыта саха дьонугар-сэргэтигэр туохтааҕар да кэтэһиилээх, дьоһун суолталаах кэминэн буолар. Бу элбэҕи эрэннэрэр ураты тыыннаах кэмҥэ ыаллар сүөһүлэрин кытта сайылыкка тахсан үлэлээн-хамсаан дьылы этэҥҥэ туоруур олук ууруллара. Ол иһин сайылыкка тахсан сиэри-туому толорон, быйаҥнаах сайыны, өҥ дьылы көрдөһөллөрө.
Хайа да кэмҥэ сайылык үлэҕэ эрэ буолбакка, үгэстэри тутуһарга, духуобунай сыаннастарга уһуйара. Оҕолор манна кыра саастарыттан үлэҕэ-хамнаска сысталлар, кырдьаҕастарга ытыктабыллаах сыһыаҥҥа, төрөөбүт сири таптыырга, айылҕаны харыстыырга үөрэнэллэр. Үлэҕэ-хамнаска улахан дьону кытта тэҥҥэ эриллии, бэйэ-бэйэни өйөһөргө үөрэнии үйэлэри уҥуордаан кэлбит олох-дьаһах үгэс буолбут укулаатын чиҥэтэр, дьиэ кэргэн бөҕөргүүр, көлүөнэлэр тыыннаах ситимнэрэ салҕанар.
Сайылык күнэ – бу самныбат санаалаах, туруу үлэһит уонна дойдуларын чахчы таптыыр дьон бырааһынньыктара. Эһиги үлэҕит тыа сирин сайдыытын, олох-дьаһах үгэс буолбут укулаатын чөл хаалларыыны, өрөспүүбүлүкэ олохтоохторун олохтоох бородууксуйанан хааччыйыыны түстүүр.
Ил Дархан Айсен Николаев саха төрүт үгэһин чөл тутар, салгыы сайыннарар, тыа хаһаайыстыбатын аһын-үөлүн дэлэтэр уонна тыа хаһаайыстыбатын үлэһитин суолтатын үрдэтэр туһуттан, 2018 сыл сэтинньи 6 күнүгэр таһаарбыт 150 №-дээх Ыйааҕынан хас сыл аайы, ыам ыйын 22 күнүгэр бэлиэтэр Сайылык күнүн олохтообута.
Ол чэрчитинэн Хара үтүө түөлбэтигэр Куоҥ Харах Михаил Сотников аатынан иппадромугар улуустааҕы Сайылык күнүгэр аналлаах тыа хаһаайыстыбаларын икки ардыларыгар Сахылык оонньуулара диэн күрэх ыытылынна. Уопсайа 17 киһилээх 6 хамаанда 17 көрүҥҥэ күөн көрүстүлэр. Күрэх түмүгүнэн кыайыылаах Хорообут хааччахтаммыт эппиэтинэстээх тэрилтэ (салайааччы Плотников Г.П.)
2 миэстэни Чүүйэ муниципальнай утитарнай тэрилтэ салайааччы Елегяев А.А.
3 миэстэ Михаил Егоров аатынан хаччахтаммыт эппиэтинэстээх тэрилтэ Нөөрүктээйи нэһилиэгэ салайааччы Шамаев П.П.
Күрэх түмүгэр кэлбит ыалдьыттарга кыттааччыларга анаан сүүйүүлээх буор босхо оонньуу ыытылынна Сүрүн бирииһи уулаах тиҥэһэни Нөөрүктээйи нэһилиэгиттэн Петр Шамаев ылла.
Эһиэхэ көхтөөх үлэҕит, үтүө үгэстэргэ ытыктабыллаах сыһыаҥҥыт, төрүт сиргитигэр-уоккутугар тапталгыт иһин үс сүрэхпиттэн махтанабын. Эһиэхэ чэгиэн доруобуйаны, этэҥҥэ буолууну, эйэлээх халлааны, дьиэ кэргэҥҥитигэр бары үтүөнү, үрдүк ыамы, өҥ дьылы баҕарабын. Дьон-сэргэ сомоҕолоһуутун, улууспут чэлгийэ сайдыытын кэрэһитин быһыытынан сайылык үтүө үгэстэрэ көлүөнэттэн көлүөнэҕэ бэриллэ турдуннар!https://rutube.ru/video/2a2c1dc88047a8ae8fe18a7f79610b8f/
