Ньукуолун- сайын кэлиитин көрсүү Күөх окко үктэнии бэлиэ кэмигэр, Ньукуолун чэчиэринньигэр, харабыт үтүө түөлбэтигэр ыам ыйын 21 күнүгэр “Айыллаан” култуура аҕам саастаахтарбытыгар анаан кутааҕа буспут кус миинэ, арыылаах алаадьылаах остуол тардылынна. Эҕэрдэ тылы “Хара нэһилиэгэ” тыа сирин түөлбэтин баһылыга Дария Назарова, И.Г.Игнатьев аатынан Хара орто спортивнай оскуола дириэктэрэ Алексей Оконешников, аал уот иччитин нөҥүө сир-дойду иччилэригэр, үөһээ айыыларга үҥэн-сүктэн, махтанан, уйгуну-быйаҥы көрдөһөн үтүө алгыһын түһэрдэ Алгыс Ачыырап. Ону тэҥэ “Харабыт историятын кэпсиир киинэлэри” көрдөрдүбүт. М.Д.Петров салайар Сталин аатынан колхуос күһүҥҥү үлэтин, сэрии бэтэрээннэрэ — аҕаларбыт, эһээлэрбит кыайыы күнүн көрсөр үөрүүлэрин, “Майа ТВ” устубут КХ Хара үлэтин-хамнаһын, 1990 сыллаахха ыытыллыбыт култуура уонна спорт эстафетатын уо.д.а. Хас биирдии кэлбит ыалдьыттарбытыгар кус кэһиилээн ыыттыбыт. Сыл аайы ыытыллар “Кус хомуйуутун акциятыгар” кыттыыны ылбыт Серафим Терентьев, Иннокентий Максимов, Николай Сидоров, Николай Иванов, Роман Плотников, Дьулустаан Иванов, Николай Васильев, Юрий Ксенофонтов, Любовь Скрябина, Павел Пестряков, Нюргун Семенов, Гаврил Сидоров, Альберт Дмитриев, Станислав Никитин, Дмитрий Егоров, Прокопий Кондаков, Руслан Олейников, Егор Петров, Алексей Оконешников, Андрей Бурнашев, Александр Семенов бааттаах булчуттарбытыгар барҕа махтал буолуохтун, куруутун Баай Барыылаах Байанайгыт тосхойо турдун.
