Ырыа, ырыа барахсан. Эн, иэгэйэр икки атахтааҕы, иннинэн сирэйдээҕи сүрэҕин сүүйэн, иэтэн-куотан истиҥин-иһирэҕин уһугуннараҕын, сырдыкка-кэрэҕэ тардыһыннараҕын, дьикти абылаҥҥа ыллараҕын, истиҥ иэйиигэ киллэрэҕин. Ырыа — киһини үөрүүгэ үрдүк өрөгөйдүүр, хомолтоҕо уоскутар, хаайтарбыт иэйиитин көҥүлгэ таһаарар дьикти күүстээх.
Ыам ыйын 22 күүгэр Самаан сайыммытын уруйдуу көрсөр үтүө мааны күммүтүгэр Саха Өрөспүүбүлүкэтигэр Култуура, Саха сиригэр Ырыа күнүгэр «Сандара Сыдьаай” ырыа ансаамбылын тэриллибитэ 10 сылыгар аналлаах “Ырыа–мин дьолум” диэн ырыа түһүлгэтэ ыытылынна. Эҕэрдэ тылларын махтал суруктарын туттардылар Хара нэһилиэгин ТСТ баһылыга Дария Назарова, Мэҥэ Хаҥалас улууһун култуураҕа уонна духовнай сайдыыга управление начальнигын солбуйааччыта Александр Кулешов.
Эҕэрдэ ырыанан киэргэттилэр Айыллаан култуура киинин үлэһиттэрэ Саха Республикатын култууратын туйгунннара Николай Васильев – Айтамыл, Виталий Очиров.
Бу сыллар усталарыгар ансаамбыл бэйэтин кыаҕынан нэһилиэк, улуус араас тэрээһиннэригэр көхтөөхтүк кыттан, Өрөспүүбүлүкэ, Бүтүн Араассыйа, Аан дойдутааҕы ырыа куонкурустарын дипломанынан, лауреатынан буолбуттара. Кэлэктиип биир тыынынан, бигэ ситиминэн, өйдөһүүнэн олороро онуоха бигэ тирэх буолар. Ансаамбл салайааччыта— СӨ култууратын туйгуна Татьяна Юрьевна Степанова.https://rutube.ru/video/79a84ea4582e31c5f2ea3b10bb26cf9a/
